貓與我為敵
《死亡寫真》睇唔成, 同朋友去左阿貓地攤飲野傾偈.阿貓地攤搬左新舖, 我第一次去, 地方大左好多, 重有人彈JAZZ唱歌, 雖然質素唔高, 但總算有d情調.
其實我唔係好"好"寵物, 但都唔抗拒. 見到d女仔玩貓, 係咁扮嗲聲叫: "貓貓..." 有時都諗: 究竟佢地真係覺得d貓得意, 定係覺得自己玩貓個樣得意d. 似乎, 佢地玩貓時, 都將自己變成貓, 喺男朋友面前既可表現愛心一面, 又可表現可愛一面, 實在一舉兩得.
去過阿貓地攤既人都知, d貓周圍走, 喺你身邊"chit chat咁轉", 其實有時都幾煩. 但上得去, 你同貓既身份對等, 只可以保持笑容, 一直做過愛貓之人.
我愛貓, 但貓卻不愛我. 一隻黑貓走到我放在身旁的背囊上, 蹲起身來, 用牠的屁股對著我. 我笑說: 嘩! 想呵屎呀! 但原來唔係屎, 而係尿. 條友仔竟然喺我背囊上撤尿!! 但我保持風度, 不敢趕牠走, 更怕因為我阻住佢方便, 懷恨在心, 撲上我塊面, 大小便齊放, 我就大鑊!
於是, 我忍辱負重, 等隻黑貓方便完畢, 才告訴侍應, 叫佢俾條濕布我抹下個袋. 個侍應吩咐我, 返去一定要洗袋, 因為貓尿好臭的, 話狗尿反而冇所謂. (真的? 搵日試下叫隻狗喺佢身上小個便, 跟住話佢知: 唔臭架, 放心!)
佢都知衰, 請左我食cheeze cake補數. 但我食到唔夠五啖, 隻黑貓又走過黎, 喺我枱面行黎行去, 我已心知不妙. 佢真係毒, 就喺我個cheeze cake上面用條脷"lam"左下, 就走左!! 擺明落我面! 話我知, 唔好以為公司請我食cheeze cake就代表佢錯, 佢小便係佢既權利, 公司毋須道歉!!
我輸了! 徹底輸了. 還以為個英文名係隻貓, d貓就會對我友善d, 原來相反.
回到家, 我只好用心清洗我的背囊, 好好檢討自己, 為何貓與我為敵.
posted by 貓 @ 1:37 am
3 Comments:
我都以為你有個貓字一定是愛貓人呢, 原來又不是...
上次跟朋友到阿貓地攤, 也跟你同樣遭遇, 有隻黑貓走到朋友背囊上撒尿...問職員有沒有消毒用品, 職員說(很抱歉)沒有, 而一位做空姐的朋友則運用其專業知識, 向職員要了梳打水和紙巾, 據說用以洗抹尿跡也有功效...下次(大吉利是)不妨試試。
(然而朋友沒有得到到cheese cake作補償, 可惜...)
我就是思存所講的那個「朋友」。如果沒記錯，在我背囊上撒尿的也是一隻黑猫。看到那貓又來動你的芝士，真是忍不住．．．．．想笑！對不起，你寫得真的很好笑～ ;-p
Tale
思存 and Tale,
原來那隻黑貓已經不是第一次作惡... 真可惡! 我回家只是用普通洗衣粉洗, 洗完感覺還可以, 就算了. 下次一定那空姐介紹的方法.
歡迎光臨我的blog.
p.s.思存, 很久之前, 我也無端端上過你的blog, 那時還未有"日不落", 也算有緣.
Post a Comment
<< Home